|
|

曼聯早前以7,000萬鎊收購卡斯米路,曼聯官方社交網亦不斷出貼為呢位球星造勢,不過其中一段卡斯米路亮相奧脫福影片就引起爭議,球迷發現曼聯將背景嘅「反格拉沙」歌曲,換成高呼「曼聯、曼聯」嘅打氣聲。
曼聯喺主場對利物浦開波前,卡斯米路首度喺奧脫福球場亮相,不過當時場內正進行抗議活動,全場球迷高唱「我哋要格拉沙滾蛋」歌曲。但係曼聯官方公布嘅亮相影片,竟然「配上」球迷高叫「曼聯、曼聯、曼聯....」嘅打氣聲,有現場球迷拎出當日嘅影片做證,踢爆曼聯「河蟹」嘅古惑行為。
事後大批網民喺曼聯官方twitter留言炮轟:「曼聯真係覺得球迷會唔知,好可憐」、「真係不知廉恥,但係曼聯咁做唔會令我覺得奇怪」、「真係好X尷尬」。
|
|