紐卡素6,300萬鎊簽伊沙克　球員已抵英國

小哥阿四 · 發表於 2022-8-26 20:21:50

獲沙特阿拉伯財團入主嘅紐卡素，今個夏天一直表現低調，不過喺轉會窗完結前突出重槌，用破球會紀錄嘅6,300萬鎊收購阿歷山大伊沙克，呢位瑞典前鋒周四(25日)凌晨已經飛抵英國，成為紐卡素嘅王牌收購。

紐卡素一直希望收購新前鋒，近日盛傳佢哋接近簽入屈福特嘅祖奧柏度，但周三(24日)突然爆出紐卡素同皇家蘇斯達傾掂數，以破球會紀錄6,300萬鎊收購阿歷山大伊沙克，呢位22歲前鋒被譽為「伊巴謙莫域接班人」，前季西甲曾攻入17球，但上季表現跌watt只有6球進帳。

紐卡素周四凌晨英聯盃2比1贏燦美爾後，領隊艾迪侯域表示：「我哋想增強前鋒線，呢個唔係乜嘢秘密，但我唔會講得太詳細。」據Fabrizio Romano報道，紐卡素同屈福特已就祖奧柏度轉會達成2,500萬鎊協議，唔排除會繼續完成埋呢單交易。