老竇幫普列錫出頭：杜曹係「球員毀滅者」

小哥阿四 · 發表於 2022-8-23 11:02:40

車路士今個夏天大換血，美國國腳基斯甸普列錫都被列入清洗名單，呢位翼鋒喺頭3輪聯賽都只係後備上陣，佢爸爸馬克就「代子出頭」，喺社交網狂Like多條批評車路士嘅貼文，包括直指領隊杜曹係「球員毀滅者」。

車路士0比3輸畀列斯聯後，馬克被發現喺twitter連續like咗3個貼文，第1個係批評普列錫競爭對手美臣蒙特同夏維斯嘅表現，認為普列錫值得有機會證明自己；第2個就係叫普列錫為自己前途着想，應該盡快離開車仔；第3個就矛頭直指杜曹：「杜曹係球員毀滅者！佢冇能力建立同激勵球員，只係識買新玩具嚟玩尚爛，之後又再重覆。」

其實馬克上季尾亦曾向杜曹開火，當時杜曹就回應：「我唔擔心有球員嘅爸爸唔鍾意我，球員冇得踢唔開心係好正常，但車路士嘅競爭就係咁激烈，呢點由簽約第1日應該已經知道。」