PSG出手截胡　斥5900萬鎊買「B施」

小哥阿四 · 發表於 2022-8-21 10:38:25

曼城中場貝拿度施華前途再出現變化，曾盛傳巴塞隆拿計劃收購呢位28歲葡萄牙國腳，但因為財政問題，遲遲未成事，英國《每日郵報》指法甲勁旅巴黎聖日耳門(PSG)趁機截胡，提出以5,900萬鎊買「B施」。

雖然巴黎聖日耳門球星如雲，但新帥加迪亞認為球隊有需要增兵，提升實力，先至有機會問鼎歐聯冠軍寶座。PSG鋒線上已經有美斯、尼馬、基安利麥巴比，所以加迪亞最想簽入中場，並睇中貝拿度施華。

其實貝拿度施華對法甲並唔陌生，因為佢2017年加盟曼城之前，曾經效力過摩納哥3季，其後以5,000萬歐元轉投「藍月亮」，協助球隊捧過4次英超、4次英聯盃及1次英足盃冠軍，佢仲有3年合約在身。

貝拿度施華上季披甲50次入13球，但今季2場英超都只係後備上陣，加上佢早前表示，曼城唔會強留任何球員，似乎暗示有離隊嘅可能性。