放棄迪莊　曼聯轉斟卡斯米路

小哥阿四 · 發表於 2022-8-18 10:28:25

曼聯2位防守中場費特、麥湯米尼今季表現差劣，收購目標法蘭基迪莊又遲遲唔肯加盟，西班牙《馬卡報》指紅魔鬼已經失去耐性，放棄收購呢位荷蘭國腳，改為斟介皇馬中場卡斯米路。

據悉曼聯已經派人前往馬德里，同呢位30歲巴西國腳嘅經理人及相關人士傾加盟事宜，並願意向皇馬開出5,000萬歐元轉會費，但皇馬方面認為卡斯米路值7,000萬歐元。

雖然兩間球會存在分歧，但並非冇得傾，畢竟皇馬今夏以1億歐元買入法國防中曹亞文尼，加上仲有另1位中場新星卡馬雲加，防守中場有充裕人腳，更何況卡斯米路已經30歲，「銀河艦隊」絕對有可能趁機出售佢，至於願意減幾多價，仲有待雙方討論。