買人陷絕望 曼聯或簽莫拉達

小哥阿四

曼聯今夏增兵處處碰壁，除咗一直簽唔到頭號目標法蘭基迪莊之外，要收購1位前鋒頂替可能離隊嘅C朗，亦毫無進展。英國傳媒指曼聯逼於無奈之下，可能會簽入西班牙國腳艾華路莫拉達。

曼聯原本有意收購博洛尼亞前鋒阿拿奧杜域，但由於紅魔鬼球迷強烈反對呢位曾涉及種族歧視嘅奧地利國腳加盟，會方惟有放棄。

另一個目標係史特加中鋒沙沙卡拉積錫，但前紅魔看守主帥蘭歷克卻勸呢位奧地利國腳唔好成「魔」。加上薩爾斯堡「新夏蘭特」施斯高拒絕加盟，曼聯可以選擇嘅前鋒寥寥無幾。

最新消息指曼聯可能打艾華路莫拉達主意，呢位29歲前鋒過去2季被馬體會外借去祖雲達斯，祖記今夏拒絕買斷佢，加上馬體會教練施蒙尼唔多鍾意用莫拉達，唔排再次將佢外借，或者以3,000萬鎊出售。

價錢方面，曼聯絕對畀得起，不過艾華路莫拉達2017至19年效力車路士期間表現差，似乎唔適合踢英超，就算曼聯簽到佢，都未必幫到手。

LasCases

唔太啱用。

Winston91

回復 小哥阿四 ##1 的帖子

干地主政車仔時，幾識用莫拉達，不過佢傷完復出後，冇咩信心影嚮表現，之後沙利就睇佢唔上眼。如果佢對英超仍然有心理陰影，就冇謂買佢啦。