羅拔仔返拜仁告別　同24個獎盃大合照

小哥阿四 · 發表於 2022-8-4 10:17:28

波蘭前鋒羅拔利雲度夫斯基為轉會巴塞隆拿，今夏同效力8年嘅拜仁慕尼黑反晒面，佢上個月終於如願轉會，「羅拔仔」為同舊東家冰釋前嫌，日前專程飛返慕尼黑同球會上下道別，仲「大晒冷」同佢喺拜仁贏得嘅24個獎盃大合照，希望球迷記得佢嘅功勞。

羅拔仔轉會前曾公開批評拜仁對佢缺乏尊重，拜仁高層亦指佢唔尊重合約，8年合作搞到醜陋收場，「羅拔仔」周二(2日)飛返拜仁同隊友、職員道別，佢就話：「一切都好好，我同所有人見面並多謝佢哋，我唔會忘記喺拜仁得到嘅嘢。」

羅拔利雲度夫斯基效力拜仁8年間，上陣375場入344球，期間拎過24個球會同個人獎項，包括8次德甲聯賽冠軍、3次德國盃冠軍、5次德超盃冠軍、1次歐聯冠軍等等，個人獎項亦有歐洲金靴獎、德甲神射手等等，佢離開前就同所有獎盃大合照，認真威水！