解開法比仔踢意乙之謎　佢自己係老闆！

小哥阿四 · 發表於 2022-8-3 10:14:30

西班牙球星法比加斯周一(1日)宣布加盟科木，雖然佢依家已經35歲，但走去踢意乙都令唔少球迷意外，而呢個謎團終於解開，原來「法比仔」已經成為科木股東之一，「自己生意自已做」就合情合理啦！

法比加斯今夏同摩納哥約滿，自由身簽約科木2年，將會着上4號波衫。科木總監、前車路士隊長韋斯就爆料：「法比加斯擁有科木股份，佢係老闆之一，所以留喺呢度嘅時間會比預期中更長。法比仔睇到球會嘅潛力，佢希望可以參與長期發展，目標係進軍意甲。」

科木喺2016年曾經破產，要由丁組業餘聯賽打起，不過2年前獲一間倫敦公司入主後，成績就不斷上揚，球隊喺2021年由丙組升上乙組，上季以第13名成績衝線。