曼城「散貨」　賣人收入創英超紀錄

小哥阿四 · 發表於 2022-7-30 10:38:10

英超各大豪門夏天密密手買人，利物浦都用破球會紀錄8,500萬鎊收購達雲紐尼斯，「擂台躉」曼城雖然都簽入艾寧夏蘭特等新兵，不過球隊人腳其實未見增強好多，事關佢哋同時放走10個球員，賣人收入高達1.74億鎊，創下英超紀錄。

曼城夏天「散貨」，重點係放走史達寧、加比爾捷西斯同辛真高3大球星，單係賣走佢哋已經套現超過1.2億鎊，另外仲賣走巴祖奴、羅密歐拉維亞等小將，離隊合共多達10人，打破車路士5年前夏天賣人套現1.66億鎊嘅英超紀錄。

曼城領隊哥迪奧拿喺社區盾賽前記招表示，幾位球星想轉會令佢不得不選擇放人：「轉會係球會同球員嘅決定，我由第1日就話，球員應該去佢想去嘅地方，我只可以話冇佢哋3個，曼城唔會有今日。我有預感曼城會掛住佢哋，但人生就係咁樣，佢哋喺新球會成功，我都會覺得開心。」