丹尼爾將加盟普馬斯 下月倒戈巴塞

小哥阿四

39歲老將丹尼爾早前約滿離開巴塞隆拿，但呢位巴西後衞並未打算退役，已經同意接受普馬斯邀請，將會加盟呢支墨西哥球隊。普馬斯將於香港時間8月8日凌晨作客同巴塞隆拿踢「甘柏盃」，意味丹尼爾到時有機會上陣倒戈。

丹尼爾上年11月重返巴塞，協助當時剛上任嘅教練兼前隊友沙維，重建球隊，呢位右閘上陣17次入1球。隨住巴塞已重回正軌，加上已簽入多位猛將，丹尼爾亦功成身退。

雖然丹尼爾已接近退役年齡，但仍然獲得普馬斯垂青，邀請佢加盟，雙方已經傾掂合約條件，只欠最後簽字，普馬斯亦透過官方社交網，公布丹尼爾即將來投。

值得一提，巴塞隆拿每年一度季前熱身賽「甘柏盃」將於香港時間8月8日凌晨舉行，對手正係普馬斯，屆時丹尼爾可以喺魯營球場正式同巴塞球迷告別。

Winston91

回復 小哥阿四 ##1 的帖子

長青樹，仲繼續踢波

LasCases

佢真係勁。