多蒙特補賀拿空缺　擬簽蘇亞雷斯

小哥阿四 · 發表於 2022-7-22 10:10:42

據德國《天空體育》報道，德甲勁旅多蒙特正考慮簽入自由身嘅蘇亞雷斯，代替因睾丸驗出腫瘤而缺陣嘅施巴斯坦賀拿，雙方可能會簽署短期合約。

多蒙特今夏重金收購施巴斯坦賀拿代替艾寧夏蘭特，但周一(18日)被驗出睾丸有腫瘤，將要暫時休戰專心治療。《天空體育》記者柏頓保爆料：「首先賀拿嘅消息令人傷心，但我哋知道佢接受緊最好嘅照顧。依家有幾個經理人為蘇亞雷斯搭路加盟，多蒙特正考慮緊呢個方案，賀拿可能會缺陣幾個星期或者幾個月，多蒙特要物色新前鋒。」

報道指史特加前鋒沙沙卡拉積錫亦係多蒙特目標之一，不過呢位塞爾維亞國腳同時受到曼聯垂青，價格不菲，如果作為短期應急，免費簽蘇亞雷斯會係更好選擇。蘇亞雷斯亦希望盡快落班，為烏拉圭喺年底出戰世界盃前提升狀態，加盟多蒙特會係雙贏局面。