女子歐國盃8強！英格蘭女足強攻夠霸氣

小哥阿四

女子歐國盃周四(21日)展開8強戰，「東道主」英格蘭女足迎戰另一名牌西班牙女足。兩隊同樣被視為冠軍熱門，英格蘭女足喺分組賽霸氣盡現，一眾攻擊球員上晒力，大有無堅不摧之勢；西班牙女足喺王牌佩迪拉絲缺陣下表現唔突出，英格蘭女足氣勢贏晒，有力搶Ｗ晉級。(周四凌晨3時開賽)

英格蘭女足自荷蘭教練威格曼執教後，表現突飛猛進，呢位上屆帶領荷蘭女足捧盃嘅主帥經驗老到，喺淘汰賽關鍵時刻更加有利。英格蘭球員信心爆棚，分組賽3戰全勝，狂轟14球而不失一球，面對勁旅挪威女足都可以大炒8比0，創下女子歐國盃歷來最大勝仗紀錄，射手美迪目前以5球高踞射手榜首位，要撕破西班牙防線冇難度。

西班牙主將缺陣

西班牙女足喺決賽周前，有女子「金球獎」得主佩迪拉絲重傷，缺少呢位進攻靈魂，球隊明顯未能適應，除首仗大炒弱旅芬蘭女足，近兩仗只係入得一粒，面對另一熱門德國女足就慘吞兩蛋，最終以小組次名出線，今仗遇上強勢嘅英格蘭女足，凶多吉少。

LasCases

強強對決。

Winston91

回復 小哥阿四 ##1 的帖子

英格蘭要好艱難在加時先返勝2:1晉級四強，睇嚟英格蘭嘅分組對手太弱先有之前好表現。今場西班牙邊鋒十分出色，經常施展人波分過落底傳中，可惜隊友終結能力一般，唔係入多一粒，領先到兩球英格蘭就追唔到。英格蘭球員優勢就係高頭大馬，體力充沛，臨完場前多次落底傳中，終於等到一次西班牙球員解圍唔到，走甩一個後上補射追平，跟住加時西班牙球員已經莫氣，比10號妹Stanway慢慢較定腳，射過世界波返勝。

mingliedy

好波