【官宣】「日本美斯」加盟皇家蘇斯達

小哥阿四 · 發表於 2022-7-20 11:59:01

有「日本美斯」之稱嘅久保建英又轉會，再次離開皇馬，轉投另一支西甲球隊皇家蘇斯達，據悉雙方將會簽約5年，轉會費為650萬歐元。

皇家蘇斯達官網公布球會高層去機場，迎接久保建英，呢位21歲中場將接受體測，如無意外將會正式簽約。

西班牙傳媒指久保建英將會同皇蘇簽約5年，雖然轉會費僅為650萬歐元，但皇馬仍然保留一半擁有權，唔排除將來回購佢，或者一旦皇蘇出售久保建英，皇馬都有分紅。

久保建英2019年6月由FC東京加盟皇馬，但一直被外借，包括踢過馬略卡、維拉利爾、基達菲，上季為馬略卡上陣31場入2球，希望佢今次轉投皇家蘇斯達，會有更好發揮啦。