車路士3星夜蒲洛杉磯　貼相後受壓即刪

小哥阿四 · 發表於 2022-7-19 10:34:07

車路士去到美國集訓，周日(17日)首場熱身賽以2比1擊敗CF阿美利加，一班球員踢波之外亦有豐富節目，美臣蒙特、列斯占士同芝維爾就去到洛杉磯夜店狂歡，芝維爾更將佢哋夜蒲相片擺上IG，不過冇幾耐就將相片刪除，有傳係因為受到車路士高層壓力。

芝維爾喺IG嘅相片入面，美臣蒙特同列斯占士喺一大班衣着性感嘅女士中間，美臣蒙特拎住個膠杯飲品、列斯占士就攬住佢高舉中指，齊齊做出伸脷嘅興奮表情，不過有傳車路士高層對佢哋明目張膽咁去夜蒲做法不滿，芝維爾隨即將相片刪除。

喺對CF阿美利加嘅熱身賽中，列斯占士炮製一個世紀烏龍波而被球迷批評，不過美臣蒙特就射入致勝球做英雄，車路士下仗熱身賽將於7月21日早上對夏洛特FC。