【官宣】唔介意做後備　祖高美斯續約紅軍

小哥阿四 · 發表於 2022-7-9 10:53:30

利物浦周五(8日)宣布，英格蘭中堅祖高美斯正式續約5年，呢位25歲球星近2季喺「紅軍」上陣次數極少，雖然有其他球員向佢提出斟介，但佢就唔介意擔任替補角色，表示留效利物浦係「容易嘅決定」。

祖高美斯原本同利物浦仲有2年合約，但雙方就提前續約至2027年，如果真係能夠完成合約，將會喺「紅軍」效力12年。祖高美斯表示：「續約對我同家人都係特別時刻，利物浦係世界最佳球會之一，我覺得自己仲後生，喺呢度會得到最好嘅發展機會，續約嘅決定非常容易。」

祖高美斯表明希望可以用表現爭取重返英格蘭國家隊，不過佢喺利物浦要上陣亦好困，右閘阿歷山大阿諾特正選穩固，喺中堅位置佢亦只係排名第4，對上2季雖然曾經重傷，但2季加埋只係踢過10場英超，要為英格蘭踢世界盃機會唔大。