C朗現身葡萄牙訓練場　離隊因為美斯？

小哥阿四 · 發表於 2022-7-6 10:26:11

決意離開曼聯嘅C朗拿度，周一(4日)以「家庭理由」冇如期向曼聯報到，不過葡萄牙媒體《SIC Noticias》就發現，C朗同一揸車去到葡萄牙國家隊位於里斯本嘅訓練中心，進行個人練習希望保持狀態，似乎有意同曼聯劃清界線。

曼聯接納C朗用「家庭理由」請假，但所有人都知實際原因係關於轉會問題，C朗周一就被影到揸住佢架白色Rolls Royce去到葡萄牙訓練中心，英國《每日郵報》指佢係借用國家隊設施保持狀態，C朗選擇唔返曼聯而自己單獨練習，就證明佢離隊決心有幾大。

有傳聞指C朗決意離開曼聯，其中一大原因係想保持佢喺歐聯嘅入球紀錄，C朗依家係歐聯史上入波最多球員(141球)，但只係比巴黎聖日耳門前鋒美斯多16球，如果C朗留低同曼聯一齊踢歐霸盃，個紀錄有機會畀美斯追近，為保住「歐聯史上首席射手」地位，唯有另覓可以踢歐聯嘅球隊效力。