C朗提早開操　粉碎離隊傳聞

小哥阿四 · 發表於 2022-6-26 10:47:44

曼聯將於6月27日開操，備戰新球季，球星C朗已經率先自己操練，睇來非常期待新球季來臨，同時亦以行動粉碎近期有關於佢想離隊嘅傳聞。

C朗近日去西班牙度假，但不忘操練保持狀態，期間借用西甲球隊馬略卡嘅訓練基地，自己加操，呢位37歲葡萄牙球星將操練相片放上社交網，同球迷分享。

近期傳出C朗不滿會方今夏仍然未能簽入新兵加強實力，擔心無法提升下季成績，於是有離隊念頭，甚至傳出經理人佐治文迪斯想促成C朗轉投拜仁慕尼黑，但呢支德甲球隊嫌佢人工太高，所以拒絕。

事實上，可以容納C朗嘅球隊亦唔多，相信佢下季繼續留效曼聯嘅機會比較大。