尹戈爾倒米成功！添巴放棄加盟曼聯

小哥阿四 · 發表於 2022-6-21 10:33:34

曼聯今夏轉會計劃諸多阻滯，據荷蘭媒體報道，原本已經同意加盟嘅阿積士中堅祖利安添巴，最後關頭決定「縮沙」留隊，當中最大原因就係荷蘭國家隊主帥尹戈爾提出警告，意味呢位前「紅魔」領隊倒米成功！

20歲嘅祖利安添巴係曼聯領隊坦哈格愛將，球會亦早早出手搶人，睇落一切非常順利，不過消息指轉會突然拉倒，荷蘭記者雲達卡恩向《天空體育》透露：「球員已經準備轉會，佢經理人2星期前就去到曼聯Office傾好，過程非常順利，錢從來唔係問題，直到尹戈爾警告佢轉會可能會減低出戰世界盃嘅機會......」

尹戈爾早前被問到祖利安添巴轉會，表示如果呢位小將去到曼聯後季初長坐冷板，會係一個「唔明智」決定，影響佢繼續入選荷蘭國家隊嘅機會。