再辣火頭！PSG叫雲尼斯奧斯唔好續約

小哥阿四 · 發表於 2022-6-21 10:32:15

因為基利安麥巴比嘅轉會風波，巴黎聖日耳門(PSG)同皇家馬德里已經勢成水火，西甲賽會更向PSG提出訴訟，不過PSG似乎冇驚過，據報呢間法甲班霸有意收購皇馬前鋒雲尼斯奧斯祖利亞，更一直慫恿佢唔好同皇馬續約，希望可以高價搶人。

近日有消息指雲尼斯奧斯即將同皇馬續約，目前只係差新約年期未達成共識，不過西班牙《馬卡報》爆料，PSG自上年11月開始，已一直秘密同雲尼斯奧斯接觸，要求佢唔好答應續約皇馬，由於呢位巴西國腳目前合約只剩2年，PSG打算逼皇馬平價放人，並答應開出4,000萬歐元年薪畀佢，足足係皇馬準備開出年薪嘅4倍。

不過，《馬卡報》指雲尼斯奧斯仍然屬於留效皇馬，呢位21歲前鋒上季喺皇馬踢出最佳水平，各項賽事攻入22球兼交出20次助攻，包括喺歐聯決賽一箭定江山贏利物浦。