美資收購撻Ｑ　艾殊利擬入主打比郡

小哥阿四 · 發表於 2022-6-16 10:13:50

美籍商人Chris Kirchner入股打比郡一事突然告吹，英冠賽會確認，雖然Chris Kirchner為首嘅美國財團，喺5月16日曾經簽署收購打比郡嘅承諾書，但到上周五截止日期時，財團都冇如期提交必要嘅保證金，確實放棄收購。

隨住美資最後階段退出，前紐卡素班主艾殊利又再出現喺潛在收購者嘅名單上。英國傳媒指出，艾殊利賣走「喜鵲」袋咗超過3億鎊，手頭上有大把資金，佢睇中打比郡嘅主要原因，係可以為佢旗下英國最大體育零售商Sport Direct，搵到一個公共平台，而且Sport Direct總部位於打比郡夏布魯克，距離打比郡主場只有30英里。

打比郡舊年開始被接管，一直搵緊買家，佢哋因財務違規被扣21分，喺前曼聯名宿朗尼帶領下，最終護級失敗，要降落英甲競逐。不過朗尼表明會留隊，幫球隊重建。