曼聯即將簽法蘭基迪莊　定下加盟死線

小哥阿四 · 發表於 2022-6-6 10:43:52

曼聯力爭簽入巴塞隆拿中場法蘭基迪莊，取得重大進展，西班牙《每日體育報》指兩間球會已經接近達成交易協議，同意轉會費為8,000萬歐元，現時只欠法蘭基迪莊最後點頭同意。

據悉曼聯早於5月已向巴塞隆拿提出收購法蘭基迪莊，紅魔鬼聘請坦哈格為新領隊後，加快斟介呢位25歲荷蘭國腳，因為坦哈格好希望再次同呢位昔日阿積士愛將合作。
雖然巴塞教練沙維想留用法蘭基迪莊，但問題係球會負債嚴重，急需要資金減輕財政負擔，只要曼聯願意支付巨額轉會費，巴塞亦肯放人，雙方傾掂數，認為8,000萬歐元，大家都可以接受。

不過，法蘭基迪莊早前表示希望留隊，其實主要原因係唔想轉投一支冇得踢歐聯嘅球隊，曼聯希望法蘭基迪莊6月中之前作出答覆，否則會轉移收購目標。