C朗一番說話　暗示將退居二線

小哥阿四 · 發表於 2022-6-5 10:22:36

葡萄牙球星C朗已年屆37歲，呢位射手近日接受傳媒訪問時，認為曼聯應該畀多啲機會年輕球員，自己亦願意擔任「人生導師」輔助新星，似乎暗示下季唔介意退居二線，最重要協助紅魔鬼重建未來。

C朗話：「新一代球員係球會嘅未來，應該畀更多機會佢哋，幫助佢哋搵到自己嘅位置，我認為英超係世界上最難踢嘅比賽，壓力非常大，需要畀年輕球員多啲時間同機會，令佢哋成長，小將們如果要取得成功，亦需要作出一部份犧牲，包括努力訓練，要有職業道德，願意付出，如果佢哋需要，我樂意提供意見，因為我好想幫助佢哋。」

至於國家隊方面，葡萄牙上仗歐國聯對西班牙，C朗僅後備上陣，踢咗28分鐘，亦係佢近5年首次未能出任國家隊正選，似乎都有意畀後輩更多上陣機會，吸收比賽經驗。
葡萄牙主帥費蘭度山度士表示，根據唔同對手，採取針對性部署，C朗唔一定踢正選，似乎正為C朗退下來做準備，葡萄牙下仗歐國聯將於主場對瑞士。