【官宣】魯迪格加盟皇馬　簽約4年

小哥阿四 · 發表於 2022-6-4 10:10:31

西甲及歐聯「雙冠王」皇馬喺轉會市場有大收穫，宣布免轉會費，簽入今夏恢復自由身嘅車路士後衞魯迪格，同呢位29歲德國國腳簽約4年，進一步提升球隊實力，為下季衞冕「雙冠」鋪路。

魯迪格效力車路士5季，捧過英足盃、歐超盃、歐聯、歐霸盃及世冠盃，佢唔止防守穩陣，並有不俗助攻力，今季為車仔各項賽事上陣54場入5球，創出個人單季入球新高。

不過，魯迪格早已決定唔續約，引來皇馬、祖雲達斯、曼聯、巴黎聖日耳門爭奪，最終由「銀河艦隊」勝出。據悉皇馬向魯迪格開出1,100萬歐元年薪合約，仲有3,500萬歐元簽字費，令佢無法拒絕。

魯迪格話：「我好自豪宣布將加盟皇馬，對於未來所有挑戰感到興奮，已經急不及待想為呢支偉大球隊上陣。」
皇馬繼上年夏天簽入自由身嘅拜仁慕尼黑中堅阿拉巴之後，今夏又免轉會費簽入魯迪格，「銀河艦隊」轉會操作果然犀利，2人下季扼守中路，勢必大大提升皇馬防線實力。