利物浦輸波照巡遊　沙迪奧文尼變「阿愁」

小哥阿四 · 發表於 2022-5-31 10:59:13

利物浦周日(29日)喺歐聯決賽不敵皇家馬德里後，返英國後按原定計劃舉行勝利巡遊，慶祝今季贏到英足盃同英聯盃2個冠軍，大批利物浦球迷都夾道歡迎。雖然係慶祝派對，但沙迪奧文尼就被影到唔少時間都「悶悶不樂」，有傳呢位前鋒將向利物浦表達離隊要求，大有機會加盟拜仁慕尼黑。

1日前先至失落歐聯，唔能夠盡興都係正常，不過「紅軍」將帥喺開蓬巴士上接受球迷歡呼，大部份都展現笑顏，領隊高普亦拎住支啤酒暢飲，但轉會傳聞主角沙迪奧文尼就表現得最唔投入，肅穆表情似乎話畀大家知，轉會傳聞唔係空穴來風。

轉會權威記者Fabrizio Romano表示，沙迪奧文尼已決定離隊尋求新挑戰，短時間內就會正式向利物浦提交轉會申請，德國《圖片報》亦指呢位塞內加爾國腳，極大機會轉投拜仁慕尼黑，由於佢同利物浦仲有1年合約，預計轉會費係3,000萬歐元左右。