伊巴謙莫域開刀抖8個月　41歲再復出？

小哥阿四 · 發表於 2022-5-27 14:22:49

啱啱協助AC米蘭拎到意甲冠軍嘅伊巴謙莫域，當地時間周三(25日)宣布做手術根治膝部傷患，預料要休息8個月嘅時間，不過呢位40歲神鋒未有如外界預測宣布掛靴，目前仍然考慮當中，有傳聞話佢可能會選擇重返美職，以41歲高齡繼續征戰沙場。

AC米蘭官方聲明表示：「伊巴謙莫域喺法國為佢左膝頭進行手術，呢次關節鏡手術係預先安排好，希望能夠徹底根治傷患，成個手術非常成功，預計休養時間為7至8個月。」伊巴謙莫域同AC米蘭今約喺夏天完結，但呢位前鋒仍未就去向作出決定。

據《ESPN》報道，曾效力洛杉磯銀河嘅伊巴謙莫域，曾表示有意重返美職，甚至效法英格蘭名將碧咸咁喺美國開發自己嘅品牌。如果伊巴謙莫域唔能夠喺歐洲頂級聯賽立足，又唔想咁快退休嘅話，去美職都係一個好選擇。