「法福雙寶」有望贏晒歐霸神射手+助攻王

joemalee · 發表於 2022-5-5 10:40:20

法蘭克福喺歐霸盃4強首回合作客贏韋斯咸2比1，次回合有主場之利，晉級決賽機會樂觀，隊內2位主力鎌田大地、菲臘高斯迪更加有望分別問鼎歐霸神射手及助攻王殊榮。
日本國腳鎌田大地喺首回合對韋斯咸，射入致勝1球，今屆累積入5球，僅落後射手榜第1位嘅格拉斯哥流浪右閘達華尼亞、里昂前鋒托高伊甘比、波圖前鋒加連奴1球，由於里昂、波圖已出局，鎌田大地爭神射手剩下主要對手僅餘達華尼亞。

鎌田大地今季各項賽事為法蘭克福入9球，有5球來自歐霸盃，可見佢踢呢項賽事，表現特別醒神，加上踢翼鋒位置，入波機會比司職右後衞嘅達華尼亞多，隨時可以反超前對方。

至於中場菲臘高斯迪以5次助攻排助攻榜第1位，由於大部分競爭對手已經出局，僅餘對菲臘高斯迪有威脅嘅球員係格拉斯哥流浪中場阿里布、韋斯咸中場柏保路科奴斯，2人同樣只有3次助攻，想追平至反超前菲臘高斯迪，機會並不大。