45歲梁雪湄轉戰商界兼任旅遊KOL 獲網民讚保養得宜似黎姿

GIRLAV · 發表於 2022-5-3 15:37:18

前TVB藝人梁雪湄（Koei）淡出娛樂圈後，轉戰商界兼任旅遊KOL，不時喺社交網站上載靚相同網民分享。日前佢嘅朋友為佢慶祝45歲生日，唔少網民都話佢保養得非常之好，無論係樣貌、皮膚質素及身材都同以前差唔多，仲有網民話佢好似後生時嘅黎姿（現改名為：馬黎珈而）添呀！

現年45歲嘅梁雪湄係TVB嘅咪神元祖，佢係中學畢業後便加入無綫藝員訓練班，1998年無綫為追擊ATV嘅《亞洲小姐競選》，推出遊戲節目《超級電波少女大激鬥》，挑選一班樣靚身材好嘅年輕女藝員組成「電波少女」，而擁有驕人身材嘅梁雪湄就係其中一個。之後，梁雪湄參與有唔少劇集拍攝，不過都係飾演配角居多，例如《真情》梁嘉慧、《陀槍師姐》陳四喜、《金裝四大才子》冬香及《ID精英》Joanna等等。喺2009年，佢約滿TVB並選擇轉到亞視發展，不過都係發展平平，未見有太大突破。2011佢就開始淡出幕前轉戰商界，除咗美容生意之外，佢仲有投資連鎖冰室生意。另外，梁雪湄亦係一位旅遊KOL ，經常「周圍飛」，好似前年10月佢就飛泰國玩咗接近一年，直至上年8月先返香港。佢不時喺社交網站上載旅行靚相，唔少網民都話佢靚女、保養得宜及外表「十年如一日」等等。最近45歲生日（4月30日）嘅梁雪湄，喺社交網站上載照片，唔少網民除咗同佢講生日快樂之外，仲紛紛留言大讚佢保養得非常之好及好似後生時嘅黎姿。