曼聯願賠償1200萬鎊　提早同馬迪爾解約

joemalee · 發表於 2022-5-3 12:17:53

曼聯今年1月將前鋒安東尼馬迪爾外借去西維爾之後，並冇打算收回佢，英國《太陽報》爆料，指紅魔鬼為咗踢走呢位26歲法國國腳，更不惜賠償1,200萬鎊「分手費」，希望提早2年解約。

安東尼馬迪爾轉投西維爾之後，表現一樣冇起色，加上受到傷患困擾，僅於西甲上陣8次，並未取得入球，預料西維爾今夏唔會買斷佢，意味安東尼馬迪爾下季又要重返曼聯。

安東尼馬迪爾周薪達24萬鎊，同曼聯仲有2年合約在身，如果等佢約滿離隊，紅魔鬼就要再為佢支付總共2,500萬鎊人工。

因此，曼聯計劃提出同安東尼馬迪爾解除餘下2年合約，畀佢1,200萬鎊作為賠償，如果成事，曼聯未來2年可以慳到1,300萬鎊人工支出，除笨有精，依家就睇安東尼馬迪爾接唔接受。