古天奴打回原形？巴塞擔心「賣唔出」

joemalee · 發表於 2022-4-30 10:42:18

巴塞隆拿中場菲臘比古天奴今年1月重返英超，以外借身份效力阿士東維拉，初期表現光芒四射受盡讚賞，不過自從3月初對列斯聯入波後，古天奴最近5仗突然做番「隱形人」，連續5場0入波兼0助攻，令巴塞隆拿擔心維拉會「縮沙」唔簽呢位巴西國腳。

29歲嘅古天奴回歸英超後，為維拉上陣頭8仗有4入波同3助攻，重現當年效力利物浦嘅威力，但最近5仗入波同助攻交白卷，維拉亦由之前3連勝變到近5仗1和4負，令人懷疑「古仔」嘅翻生只係虛火。維拉同巴塞嘅外借合約中，有3,300萬鎊嘅買斷條款，隨住「古仔」突然走樣，西班牙《每日體育報》指巴塞高層擔心「賣唔出」，事關教練沙維好需要呢筆轉會費作為重建資金。

不過，英國《The Athletic》就指維拉目前態度，仍然係傾向收購古天奴，始終以3,300萬鎊價錢簽入一個公認有頂尖質素嘅球員，仍然係值得冒險嘅投資，當然如果古天奴最後幾仗狀態每況愈下，或會令維拉有更多嘅猶豫。