自認地上最強！沙拿望贏金球獎贈阿拉伯人

joemalee

利物浦球星穆罕默德沙拿今季表現繼續強勢，目前正協助利物浦向住4冠王嘅目標邁進。佢日前受訪時表示，希望憑住幫球隊贏聯賽同歐聯冠軍以奪得2022年度金球獎，成為首位贏得呢項殊榮嘅阿拉伯球員；又豪言認為自己係地球上最強嘅球員，但絕對尊重其他對手。

沙拿今季為「紅軍」各項賽事上陣42場攻入30球，2月先贏得英聯盃冠軍，依家更有機會衝擊4冠王。佢日前接受英國媒體《442》訪問時表示，希望可以喺今季擸晒所有冠軍，以造就自己競逐今個年度嘅金球獎，並藉此作為送畀阿拉伯國家人民嘅禮物：「我其中一個人生目標係改變人民，尤其是我祖國同阿拉伯國家，令佢哋覺得其實自己都可以追夢。」

佢仲話對自身充滿信心，喺尊重別人嘅前題下一直深信自己係地球上最強嘅足球員：「當然我唔會話自己勁過呢位勁過嗰位，但喺我心目中自己就係最好。」0

BB29

表現繼續強勢

LasCases

下半季有d回落，希望過咗齋戒月會好D。