李麗珍女兒許倚榕被指似陳法拉媽媽曾代發言對娛樂圈無興趣

GIRLAV · 發表於 2022-4-19 15:04:38

星二代一向受關注，除咗邱淑貞女兒沈月、葉玉卿女兒胡芷欣等等，李麗珍與前夫許愿所生嘅女兒許倚榕（Annise）近年都成討論話題；許倚榕細個嗰陣以眼鏡妹造型與爸爸出席活動，現年25歲嘅佢氣質已經唔同晒，李麗珍御用髮型師Daniel稱許倚榕為「星二代女神」，亦有網民指許倚榕無論外貌定氣質都似足陳法拉。

許倚榕早年遠赴加拿大修讀設計課程，亦學識化妝打扮，眼大大鼻高高又有一雙長腿嘅佢被指女大十八變。據指，許倚榕獲唔少經理人公司睇中，想簽佢做旗下藝人。而日前，許倚榕喺IG分享明顯悉心打扮嘅一黑一白造型照，似足模特兒照，不過就未有解釋相片由來。不過，李麗珍曾經表示，女兒想專注發展設計所長，亦中意低調平凡嘅生活，對娛樂圈無太大興趣，而自己都唔會鼓勵女兒入行。

許倚榕現時亦與朋友開設網上時裝店賣女裝衫，自己做埋生招牌親自試着服飾吸客。許倚榕亦與一般少女無異，不時都會喺IG分享生活照；曾經多次上載與男友嘅甜蜜合照，不過現時已全部刪掉有關照片，只剩返單人照及與朋友嘅合照，相信已經回復單身。