C朗周中「雙紅會」等破英超100球大關

joemalee · 發表於 2022-4-18 12:29:39

曼聯球星C朗上場英超對諾域治轟入3球，兩度效力曼聯合共踢咗222場英超，取得99個入球，換言之只要周三(20日)凌晨「雙紅會」作客利物浦，再入1球，就達到百球大關，如果C朗可以喺呢場大戰，寫下新里程碑，就更加大意義。

C朗喺英超入波最多一季係2007/08年球季，有31球進帳，成為該季神射手，佢加盟皇馬前，為曼聯入咗84個聯賽入球，加上今季入15球，累積入99球，紅魔鬼今季剩下6場聯賽，C朗要再入1球，應該唔難，如果下場對宿敵利物浦，完成壯舉，就更加完美。

另外，C朗以37歲零70日成為英超史上第2大年齡上演「帽子戲法」球員，僅次於舒寧咸(37歲零146日)。根據C朗同曼聯簽訂嘅合約，佢每次「戴帽」都可以獲得10萬鎊獎金，一季入波達20球就有75萬鎊獎，佢今場入3球，今季各項賽事已有21球進帳，換言之今場波為佢帶來85萬鎊獎金收入。