阿仙奴爭奪柏基達　亨利力薦

joemalee · 發表於 2022-4-17 10:08:20

阿仙奴今季拎唔拎到歐聯資格，夏天都勢必大事增兵，據法國傳媒報道，「兵工廠」睇中里昂嘅巴西中場盧卡斯柏基達，呢位獲亨利稱為「法甲最佳球員」嘅中場，轉會費可能高達5,800萬鎊，而紐卡素同巴黎聖日耳門都喺競爭行列，想簽佢都唔係易事。

法國傳媒消息指，阿仙奴嘅巴西總監伊度，對盧卡斯柏基達非常欣賞，近幾個星期已開始同佢進行接觸，不過呢位巴西國腳同里昂合約去到2025年，轉會費估計達5,800萬鎊。阿仙奴目前嘅中場增兵名單，仲有泰利文斯、魯賓尼維斯等等。

阿仙奴名將亨利對盧卡斯柏基達亦有極高評價，佢今季曾形容呢位24歲中場係「法國最佳球員」：「柏基達嘅扭波、助攻梗係精彩，但最犀利係佢嘅全方位嘅無私踢法，佢唔似一般巴西球員，就算冇波在腳一樣會笑住咁去為球隊作出其他貢獻，呢點先係最令人欣賞。