森巴軍團踢控傳？巴西千萬年薪挖哥帥執教

joemalee · 發表於 2022-4-9 10:42:02

哥迪奧拿同曼城嘅合約去到出年夏天就完，據西班牙媒體報道，巴西足總正打算以2,000萬歐元年薪力邀哥帥執教，接替將於卡塔爾世盃後離任嘅迪迪。

據西班牙《馬卡報》報道，自2016年開始執教巴西國家隊嘅60歲教頭迪迪，將於踢完卡塔爾世盃後離任。巴西足總正積極尋找佢嘅繼任人，唔排除會搵外國人執教，而喺出年6月同「藍月亮」完約嘅哥迪奧拿，更成為「森巴軍團」嘅目標。

報道指，巴西足總已聯絡哥帥嘅哥哥兼經理人，打算以一年1,200萬歐元嘅薪酬吸引哥帥來投，合約期預計至2026年世盃決賽周，但呢筆錢比佢依家喺曼城賺緊嘅2,000萬歐元年薪少得多。
不過，上月有巴西記者問過哥迪奧拿對執教巴西嘅意向時，佢咁樣回答：「巴西有好多優秀嘅教練，佢哋有能力執教國家隊，討論結束！」按照佢咁嘅反應，睇嚟哥帥冇咩興趣喎。