肥安病情反覆　或由囝囝領軍鬥車路士

joemalee · 發表於 2022-4-6 10:55:59

皇馬教練安察洛堤早前確診新冠肺炎，缺席上場西甲領軍對切爾達，呢位意大利名帥嘅病情反覆，周一(4日)並未有現身指揮球隊操練，西班牙傳媒指如果「肥安」未能及時痊愈，就會由佢嘅兒子兼助教大衞領軍出戰歐聯8強首回合作客車路士。

據悉安察洛堤最近1次接受檢測，仍然發現確診，皇馬周二(5日)就會飛去倫敦備戰歐聯，「肥安」將於周三(6日)接受最後1次檢測，如果痊愈，就會立即飛去倫敦同球隊會合，希望親自督師。

一旦安察洛堤無法起行，就會由「小安」大衞及皇馬青訓主管柏度莫合作領軍，安察洛堤近年執教拿玻里同愛華頓，32歲嘅大衞都喺身邊幫手，應該喺爸爸身上學到唔少嘢。
皇馬上場西甲喺「肥安」缺席下，「小安」擔大旗帶隊，憑賓施馬射入2球12碼，以2比1擊敗切爾達，但今場歐聯對手係英超勁旅車路士，若然「肥安」未能親自指揮大局，恐怕形勢不妙。