捲入鍾培生袁嘉敏糾紛葉蒨文靠努力由「同學甲」變「島大四美」

GIRLAV · 發表於 2022-4-4 13:07:59

袁嘉敏上周出post數落鍾培生父子，引爆大量花生，今日更有指袁嘉敏因為不滿鍾培生同TVB藝人葉蒨文關係密切而玩自爆。而葉蒨文就承認同鍾培生相識，有一齊去慈善晚宴，但只係一大班人出席。

葉蒨文因為拍《愛．回家之開心速遞》而為人認識，上年簽埋TVB經理人合約做「親生女」，今次事件令佢多咗人識，可能係好事。

29歲嘅葉蒨文(Sophie)出身於單親家庭，有2個大佢成20年嘅哥哥同家姐，中五畢業後到英國讀書，畢業於京士頓大學服裝設計系，同陳奕迅係校友！Sophie亦有學跳舞，並曾經去北京舞蹈學院考中國舞12級資格試。

大學畢業後Sophie因為想做演員而參加2016年港姐，但係30強止步，不過獲無線招攬加入做藝員。新人入行多數做「茄喱啡」，葉蒨文當然做過路人甲，而《愛．回家之開心速遞》入面，本來只係安排Sophie做熊心如（蘇韻姿飾）其中一個同學，角色名都冇。後來因為監製睇中先成為固定角色Candy，甚至被唔少觀眾記得係「島大女神」之一。舊年年頭葉蒨文成為TVB「親生女」之後，年尾台慶頒獎禮即刻入圍「飛躍女藝員」。

喺捲入「袁鍾之亂」之際，葉蒨文喺IG 限時動態post同男友慶祝拍拖4周年嘅合照，原來男友係藝術界人士，亦好支持女友做演員。