哥帥下戰書：利物浦會全勝但輸畀曼城

joemalee · 發表於 2022-4-4 11:01:25

英超今周末重啟戰線，曼城2比0贏般尼，喺短暫失去榜首位置後，重新壓過利物浦登頂。領隊哥迪奧拿賽後受訪時更向「紅軍」下戰書：「佢哋會贏晒每一場比賽，但希望輸畀我哋。」

利物浦上周六（2日）2比0輕取屈福特，場波喺早曼城兩個半鐘踢嘅情況下，「紅軍」短暫地坐喺榜首，但隨住「藍月亮」以同樣比數擊敗般尼後，榜首位置再次由曼城坐上。不過哥迪奧拿承認，今場作客般尼一啲都唔易踢：「呢個球場好難踢，因為草又長又乾，球速變得好慢，但我哋做得好好，贏咗場比賽。」

曼城依家領先利物浦1分，雙方將於下周日（10日）對壘，呢場將會係決定今季英超冠軍誰屬嘅關鍵戰。哥帥賽前更向對手下戰書：「我哋知道佢哋會贏晒所有比賽，但希望會輸畀我哋。同樣地，我哋都會盡力爭取全勝。下一場比賽會對馬德里體育會（歐聯8強），然後就係利物浦。佢哋話想同我哋嚟一場真正嘅對決，我哋接受呢一點。」