徐子珊息影後繼續弗爆將為籌款晚宴罕有露面

GIRLAV · 發表於 2022-3-31 16:45:04

現年42歲嘅徐子珊，2019年宣布退出娛樂圈，專注學業向心理學發展，可惜受疫情影響暫緩移居歐洲進修同生活。息影後嘅子珊繼續留喺香港，不過佢作風低調，久未公開露面，連Facebook同IG嘅帳號都取消，而微博最後更新嘅相片已經係兩年幾前。最近某馬來西亞慈善機構喺社交網站上載一條關於子珊即將出席一個馬來西亞嘅籌款晚宴，消息傳出後唔少粉絲都表示期待及支持。

徐子珊喺2004年參選港姐奪得冠軍後加入無綫，入行後參與唔少劇集拍攝，例如《溏心風暴之家好月圓》、《仁心解碼》、《雷霆掃毒》、《My盛Lady》及《潛行狙擊》等等，成為無綫當紅花旦之一。佢先後8次提名視后，不過可惜與該獎項無緣。2015年佢選擇離巢，16年簽王祖藍公司，轉戰內地發展「搵人仔」。2019年佢宣布退出娛樂圈，息影之作就係內地網絡電影《財神》，佢喺電影中飾演柳七七，古裝造型充滿仙氣。息影後嘅子珊有唔少製作組誠邀佢復出，不過佢都不為所動，未有接下工作。

喺片段中，罕有露面嘅子珊保養得宜，睇落容光煥發，身型繼續弗爆。作為嘉賓之一嘅佢指自己將會出席一個籌款晚宴，亦邀請各位參與，希望可以籌到100萬令吉，去幫助弱勢社群，最後再呼籲各位支持晚宴及拍賣會。而呢個籌款晚宴將於4月1日喺馬來西亞舉行，唔少子珊嘅粉絲知道後都表示非常期待及支持。