意大利死因：前鋒輸級數　佐真奴一生之痛

joemalee · 發表於 2022-3-26 11:28:33

歐國盃冠軍意大利喺世盃外悲情出局，「敗家」兩個字係最大原因，意大利今場圍攻北馬其頓製造32次攻門，入唔到波實在係咎由自取，事實上意大利今場已盡派6名前鋒登場，不過成條鋒線竟然冇一個有份踢今季歐聯，「級數」似乎孭唔起「意大利」呢個足球名牌。

巴治奧、韋利、迪比亞路、恩沙基、托迪......意大利出產過無數頂級前鋒，不過近年前鋒「卡士」大跌，今場正選三叉戟恩斯治尼、恩莫比尼同杜文尼高貝拉迪，加上後備上陣嘅祖奧柏度、拉斯柏度尼同羅倫素柏歷堅尼，6個攻擊手全冇今季都冇份踢歐聯，情況令人唏噓。

敗家嘅唔止係前鋒，12碼劊子手佐真奴亦係意大利出局罪人，佢喺外圍賽2鬥瑞士都有12碼宴客，令2場贏波變成和波，最終以2分之差輸畀瑞士失去首名出線資格。佐真奴出局後亦自責表示：「我哋要面對現實，出局我有責任，我唔會忘記分組賽射失嘅2個12碼，依家諗番仲好心痛，我一世都唔會忘記。」