拒絕皇馬拜仁　魯迪格同意加盟祖記

joemalee · 發表於 2022-3-21 12:17:07

車路士後衞魯迪格將於今夏約滿自由身離隊，成為皇馬、拜仁慕尼黑等大球會爭奪目標，英國《每日郵報》指呢位29歲德國國腳已選擇加盟祖雲達斯，雙方將會簽約4年，年薪為540萬鎊。

魯迪格將於今夏「落車」已經係公開嘅秘密，加上屬於自由身球員，免轉會費，因此吸引皇馬、拜仁慕尼黑、祖雲達斯、紐卡素、曼聯等多支球隊注意，原本以皇馬、拜仁最有機會簽入魯迪格，但呢位中堅卻傾向加盟祖記。

事實上，魯迪格對於意甲並唔陌生，佢曾於2015至17年效力羅馬2季，並打出名堂，被車路士收歸旗下。據悉，魯迪格之所以拒絕皇馬、拜仁，並選擇祖雲達斯，好大程度上由於加盟祖記，可以穩坐正選，因為祖記2位中堅邦路斯、基亞連尼分別已34及37歲，接近退役年齡，魯迪格正好可以頂替佢哋嘅位置。