生意上軌道被第5波打殘鄺潔楹3線全失守蝕到入肉

GIRLAV · 發表於 2022-3-3 18:07:59

無綫小花鄺潔楹去年於商界大展拳腳，大手投資曲奇、時裝及健身室生意，沒料被第5波疫情打殘，單是健身室租金已需「白嘔」6位數字，令她頭痕到爆！而傅嘉莉的自家品牌首飾，因寄賣的髮型屋閂門，迫使要於網上直播帶貨兩粒鐘。

本地第5波疫情確診數字近日於3萬多宗徘徊，不少藝人亦先後染疫，電視台要封錄影廠消毒，嚴重影響拍攝進度。藝人未能開工已夠無奈，沒料連帶經營的副業也因疫情搞到零收入，認真叫苦連天！

向來有生意頭腦的鄺潔楹（Judy），去年中有感本地疫情緩和，為一嘗當老闆滋味，漁翁撒網分別投資曲奇餅、女裝及健身室，起初各方面進度均不錯，沒想過正上軌道之際，卻遇上新一波疫情突襲，雖然起初也稍作變陣，但及後情況一發不可收拾，搞到她有得震冇得瞓！

昨日Judy受訪時也唉聲嘆氣，表示今次疫情對她影響非常大，首先原定本周要為無綫的回歸劇開工，但現時要延期至另行通知，至於副業生意，她坦言非常頭痕：「好在曲奇暫時未有實體店，呢段時間未諗住做期間限定店，本身2月頭有接到網上送貨訂單，但疫情嚴重做唔到，已經停咗2星期，都唔想送貨司機去大廈送貨有風險。」而去年10月投資6位數字開設的健身室，就認真蝕到入肉，她說：「開頭2個月營業額都達標，大家幾樂觀，但去到1月要閂嘅時候，連一對一為學生設計嘅上門課程都做唔到，所以要白交租，雖然業主好好有減啲租，但都要交成6位數字，預計4、5月都開唔到添！」

傅嘉莉開Live賣貨

Judy的時裝生意原定今個月底推出12款春夏服飾，惟預計疫情影響市民購物欲，故暫定延後兩個月再推出市場，不過手頭上亦有一些款式適合現時天氣，為免貨品囤積，她有意充當網紅於網上開直播帶貨。

除了Judy，有自家首飾品牌的傅嘉莉，以往把首飾擺放在兩間髮型屋銷售，惟現時髮型屋需關閉，變相令她苦無出貨之路，不過她腦筋急轉彎，日前於社交平台開Live兩粒鐘Sell貨，不少網民也紛紛留言想幫襯，這招可謂相當管用！