比利健康惹憂慮　巴西醫院：情況穩定

joemalee · 發表於 2022-2-24 10:54:09

據西班牙傳媒報道，去年12月因治療結腸癌而一度被送院嘅比利，日前接受化療時被診斷出泌尿系統受感染，要延長住院時間，不過醫生透露佢喺幾日內就可以出院，球迷暫時都唔需要擔心「球王」嘅身體狀況。

去年9月巴西「球王」比利被診斷出患結腸癌，需要係咁入院接受化療，所以近月不斷傳出比利病危嘅消息，包括上年12月再次進入同一間醫院做療程，留院10幾日後出院同家人過聖誕。

今個月13號，81歲嘅比利再次入院做化療，不過今次經醫生嘅身體檢查時，發現比利嘅泌尿系統受到感染，需要延長住院時間，但醫生表示：「佢嘅情況穩定，預料將於幾日內出院。」

除咗結腸腫瘤外，近年比利仲受到大腸、肺部腫瘤嘅煎熬，另外佢嘅脊柱、髖關節同膝蓋都曾經出現問題，比利嘅健康狀況不斷惡化，呢啲問題都令到世界各地球迷擔心。