張寶兒被翻出選港姐舊照雙眼距離變近判若兩人惹整容疑雲

GIRLAV · 發表於 2022-2-18 15:11:22

張寶兒（Bowie）參選2016年度香港小姐奪得「友誼小姐」而入行，亦與當時擔任評判嘅袁偉豪結緣，後嚟一齊拍攝《打工捱世界II》擦出愛火花，拍拖3年後喺2020年結婚，袁偉豪榮升為「千億駙馬」，張寶兒喺事業路上亦多棲發展。不過網民似乎對佢嘅衣著品味及容貌更有興趣，仲留意到張寶兒雙眼距離愈嚟愈近，雙眼皮亦比以前深邃，惹嚟整容疑雲。

入行6年，張寶兒被安排主持《Think Big天地》、《學是學非》、《姊妹淘》等綜藝節目，亦參與過《鐵探》、《使徒行者3》、《星空下的仁醫》等劇集拍攝；演藝工作以外，張寶兒亦熱衷時裝，不時喺IG分享型格寫真，早前更替一班「聲夢學員」配搭演唱會造型，雖然負評不斷，但張寶兒照樣繼續喺IG大曬靚相，近日就有網民翻出張寶兒參選港姐時嘅舊照，並對比佢最近嘅自拍照，驚嘆張寶兒五官比6年前更精緻立體，而雙眼距離相差極大，唔單止覺得佢割咗雙眼皮，更開埋眼頭。

不過，有網民表示可能係張寶兒改變咗化妝方法，例如延長眼線都可做到拉長及放大眼形嘅視覺效果；另外都有機會因為張寶兒用咗雙眼皮貼，事關佢早於《姊妹淘》及個人YouTube頻道分享過雙眼皮密技，張寶兒分享指自己為內雙眼皮，所以中意用網狀雙眼皮貼，亦教授雙眼皮貼用法，有網民大讚教學詳細，仲話如果佢真係有割雙眼皮的話，應該唔洗日日痴雙眼皮貼。