沙拿單刀球證離譜吹完場　神鋒照創紀錄

joemalee · 發表於 2022-2-18 11:06:42

利物浦喺歐聯16強作客國際米蘭部署成功，雖然機會唔多但把握力一流，最終喺尾段發力連入2球贏2比0。其實「紅軍」喺完半場前曾經有黃金機會，穆罕默德沙拿喺中圈一次美妙組織成功突破，雖然處於中場但已成單刀姿態，點知球證竟然即刻吹雞完場，而當時仲有幾秒先至夠2分鐘補時，鳴笛後穆罕默德沙拿亦一臉難以置信，利物浦球迷當然亦鬧爆球證。

好在利物浦最後都順利贏波，穆罕默德沙拿亦有入球，令佢創造唔少紀錄。今場係佢第50場歐聯賽事，累積入球增加至33球，成為史上頭50場歐聯入波第3多球員，僅次於C朗拿度同埋羅拔利雲度夫斯基，而且亦係佢連續第8場歐聯作客入波。

另外，穆罕默德沙拿喺分組賽曾經攻破AC米蘭大門，今場入埋國際米蘭波，係史上第2個一季內歐聯入晒米蘭雙雄波嘅球員，上一個就係10/11球季效力熱刺嘅高治。