奧巴美揚免費投巴塞　阿仙奴仲要賠錢

joemalee · 發表於 2022-2-3 21:16:17

巴塞隆拿宣布，正式簽入啱啱同阿仙奴解約嘅前鋒奧巴美揚，延續阿仙奴專賣隊長畀巴塞嘅傳統，雙方簽約3年半，有指阿仙奴仲要賠700萬鎊分手費送走呢位射手，認真無奈。

阿仙奴喺較早時間於官方發聲明，同奧巴美揚達成解約協議，並感謝佢過去4年為球隊貢獻好多重要入球。阿仙奴為踢走佢張35萬鎊周薪「肥約」，決定同佢提前18個月解約，今次解約收唔到轉會費，但為咗慳番其年半約2,500萬鎊人工，惟有一次性畀700萬鎊作部分補償，總好過要養住呢位已不在主帥阿迪達計劃之內嘅前鋒。

巴塞於周三較後時間，正式宣布奧巴美揚免費加盟，並且完成註冊，雙方簽約至2025年6月，違約金高達1億歐元，奧巴美揚亦係繼亨利、法比加斯及華美倫之後，另一位轉投巴塞嘅阿仙奴隊長。