越南「暗黑戰術」　安排爛場畀國足操練

joemalee · 發表於 2022-2-1 21:00:26

中國隊將於周二(2月1日)晚上世界盃外圍賽亞洲區B組作客越南，包尾嘅越南7戰全敗，包括首循環2比3不敵國足，已篤定出局，但越南都希望取得分數「零的突破」，不惜使出「暗黑戰術」，安排爛場畀國足操練，連更衣室都冇，練完波仲要焗住返酒店沖涼。

中國隊上周五(28日)已抵達越南河內，被安排喺行待體育場操練2日，呢個球場興建於上世紀50年代，球場設施非常簡陋，連更衣室都冇，球員只可以喺場邊換衫，操練後要返到酒店，先至有得沖涼。

國足要等到賽前1日，先至可以去到比賽球場美亭體育場練波，呢個球場可容納4萬位觀眾，但因為疫情關係，屆時只會開放一半座位，對當局防疫係一大挑戰。

越南國內疫情嚴峻，隊長桂玉海因為確診新冠肺炎，將缺陣今場比賽，另外3位球員阮黃德、阮進靈、阮文全早前亦中招，但現時已經康復。
中國隊現時落後第3位澳洲9分，如果今場失分，或者澳洲作客阿曼取得分數，中國都會出局。