普巴終極攤牌　表明今夏要轉投皇馬

joemalee · 發表於 2022-1-21 21:00:31

英國《每日郵報》爆料，指曼聯中場保羅普巴同球會管理層開會之後，向對方表明自己已經決定今夏離隊，並轉投皇馬，意味紅魔鬼將會人財兩失。

保羅普巴將於今夏約滿，佢同球會一直未能就續約問題達成協議，據悉呢位28歲法國國腳近期同管理層開會，表明唔會再傾續約，因為佢已經決定以自由身轉投皇馬。

前祖雲達斯中場馬治斯奧喺社交網呼籲保羅普巴重返祖記，兩人曾於2012至16年喺祖雲達斯合作，加上教練阿里基已返回祖記執教，馬治斯奧希望普巴返回呢支意甲勁旅「團聚」。不過普巴始終心繫皇馬，估計祖雲達斯同巴黎聖日耳門都未能簽入佢。

曼聯2016年8月以8,900萬鎊向祖雲達斯收購保羅普巴，但佢表現一直未如理想，上年11月受傷之後一直缺陣，近期已經復操，預料可於下月初復出上陣。

雖然保羅普巴無意留隊，但看守領隊蘭歷克早前透露，相信普巴為咗吸引其他球會簽佢，今季餘下時間將會落力演出，所以仍然會派佢參加比賽。