亨利有望重執教鞭？波爾多想搵佢教

joemalee · 發表於 2022-1-21 20:57:28

法國傳奇前鋒亨利有望重返法甲教波，當地傳媒報道，法甲波爾多睇中亨利，認為佢係球隊主帥適合人選。

波爾多現時排尾二，深陷降班威脅，現任主帥佩特科域面臨被炒命運，球會主席洛佩斯開始考慮新帥人選，認為亨利最適合；報道指，波爾多下仗主場對斯特拉斯堡，如果未能取勝，佩特科域將被辭退。

亨利早於2016年開始教練生涯，當時加入比利時國家隊擔任助教，2018年比利時獲得世盃季軍後，佢重返母會摩納哥擔任主帥，可惜僅執教3個月就因成績太差離隊，其後佢轉戰美職聯執教蒙特利爾，去年重返比利時助教位置至今。