摩連奴欽點！美蘭尼爾斯將投羅馬

joemalee · 發表於 2022-1-6 21:12:40

據英國同意大利傳媒報道，羅馬同英超球會阿仙奴達成協議，將會借用英格蘭中場美蘭尼爾斯至季尾，消息指呢單交易係摩連奴親自要求，雖然合約並冇包含任何買斷條款，但羅馬仍希望喺季尾將美蘭尼爾斯正式收歸旗下。

羅馬一直希望增強中場力量，季前因為價錢傾唔掂未能收購阿仙奴中場格列沙加，估唔到摩連奴1月又睇中另一阿仙奴中場美蘭尼爾斯，羅馬最初要求借用半季外加1,000萬歐元買斷條款，不過「兵工廠」認為價錢太低，最終羅馬決定提高借用費至100萬鎊，喺冇任何條款下純粹借用半季。

報道指摩連奴對美蘭尼爾斯情有獨鍾，計劃借用完結後再次提出收購，所以今個月會主力賣球員套現。羅馬目前陣中已有基斯史摩寧同譚美阿巴謙2個英格蘭球員，美蘭尼爾斯加盟會進一步壯大羅馬嘅「三獅力量」。