巴塞失分排第7過聖誕　創近18年最差成績

joemalee · 發表於 2021-12-22 21:00:32

周三(22日)凌晨西甲大戰，巴塞隆拿作客逼和西維爾1比1，完成今年聯賽，篤定以第7位過聖誕節
，創出球隊自2003年之後，同期最低排名，今季唔好話爭標，恐怕連能否打入前4位，參加下屆
歐聯都成為疑問。

巴塞隆拿上場被護級球隊艾爾切攻入2球，但防線仍然冇吸取教訓，開波22分鐘幾乎失守，當時西
維爾前鋒拉菲爾美亞單刀射入，但因為越位在先，被判無效。10分鐘之後，西維爾都係先開紀錄，
拿傑迪錫開出角球，由艾真度高美斯射成1比0。

不過，巴塞隆拿臨完上半場前，以角球戰術還擊，奧士文尼迪比利開出角球，由朗奴阿拿奧祖頂入
扳平。

踢到64分鐘，西維爾後衞祖利斯古迪執界外球時，同對手發生推撞，一時沉唔住氣，用波掟向佐迪
艾巴，結果換來1張紅牌，被趕出場。巴塞隆拿踢多1人，原本有機會反勝，奧士文尼迪比利勁射，
但中柱唔入，最終打和1比1。